2Ti 1 | NdeIBE | STEP | UPhawuli, umphostoli kaKhristu uJesu ngentando kaNkulunkulu, mayelana lesithembiso sokuphila okuku-Khristu uJesu,

2 Timothy 1

1 UPhawuli, umphostoli kaKhristu uJesu ngentando kaNkulunkulu, mayelana lesithembiso sokuphila okuku-Khristu uJesu, 2 KuThimothi, indodana yami ethandekayo: Umusa, lesihawu kanye lokuthula okuvela kuNkulunkulu uBaba lakuKhristu uJesu iNkosi yethu.

Isikhuthazo sokwethembeka

3 Ngiyambonga uNkulunkulu engimkhonzayo, njengokwenziwa ngokhokho bami, ngesazela esimsulwa, lapho ngikukhumbula kokuphela emikhulekweni yami ebusuku lemini. 4 Lapho ngikhumbula izinyembezi zakho, ngifisa ukukubona, ukuze ngibe lokuthokoza okukhulu. 5 Ngikhunjuzwe ngokukholwa kwakho okuqotho, okwaqala kugogo wakho uLoyisi lakunyoko uYunisi, njalo ngiyathemba ukuba khathesi kukhona lakuwe futhi. 6 Ngenxa yalokhu ngiyakukhumbuza ukuba uvuthele isipho sikaNkulunkulu esaba kuwe ngokubekwa kwezandla zami phezu kwakho. 7 Ngoba uNkulunkulu kasiphanga umoya wobugwala, kodwa umoya wamandla, lowothando kanye lowokuzithiba. 8 Ngakho ungabi lenhloni ukufakaza ngeNkosi yethu, loba ube lenhloni ngami isibotshwa sayo. Kodwa hlanganyela lami ekuhluphekeleni ivangeli, ngamandla kaNkulunkulu, 9 owasisindisayo wasibizela ekuphileni okungcwele – kungayisikho ngenxa yokuthi kukhona esakwenzayo kodwa ngenxa yenjongo yakhe langomusa wakhe. Umusa lo sawunikwa ngoKhristu uJesu ngaphambi kokuqala kwesikhathi, 10 kodwa khathesi usubonakaliswe ngokubonakala koMsindisi wethu, uKhristu Jesu, osechithe ukufa waletha ekukhanyeni ukuphila lokungafi ngevangeli. 11 Njalo ivangeli leli mina ngabekwa ukuba ngummemezeli lomphostoli kanye lomfundisi walo. 12 Yikhonje ngihlupheka njengoba nginje. Kodwa kangilanhloni, ngoba ngiyamazi engikholwa kuye, njalo ngiyakholwa ukuthi ulamandla okulondoloza lokho engikubeke kuye ngalolosuku. 13 Lokho owakuzwa ngami, kugcine njengesibonelo semfundiso epheleleyo, ngokukholwa langothando kuKhristu uJesu. 14 Londoloza isibambiso osiphathisiweyo – silondoloze ngosizo lukaMoya oNgcwele ohlala phakathi kwethu. 15 Uyakwazi ukuthi abantu bonke esigabeni sase-Asiya sebangidela, kubalwa loFigelu kanye loHemogene. 16 Sengathi iNkosi ingaba lomusa kwabendlu ka-Onesiforu, ngoba wayehlala engivuselela njalo wayengelanhloni ngezibopho zami. 17 Kodwa, kwathi eseRoma, wangidinga kakhulu waze wangithola. 18 Sengathi iNkosi ingenza ukuba athole umusa eNkosini ngalolosuku! Uyakwazi kakuhle ukuba wangisiza ngezindlela ezinengi kangakanani e-Efesu.